Кыв поз. Нёльӧд чукӧртчӧм

"Кыв поз" проектлӧн нёльӧд чукӧртчӧм муніс тӧдлытӧг да ӧдйӧ. Мунтӧдз ӧтувъя снимок.

Бать-мам медводз кывзісны челядь психолог Мария Грищенкоӧс. Ӧта-мӧдкӧд тӧдмасьӧм бӧрын висьталіс сёрнитан стратегияяс йылысь - кыдзи сёрнитны мукӧд бать-мамыскӧд, медым эскӧдны найӧс, мый кагаыдкӧд колӧ сёрнитны комиӧн.

Вӧлӧмкӧ, тайӧ абу кокни удж.

Со, шуам, некымын вӧзйӧм:

1. Сёрни колӧ панны бурторсянь ("бур, мый коми кыв тӧдан...");

2. Оз ков вомъёртыдлы кӧвъявны ас мӧвпъястӧ;

3. Вӧдитчыны со татшӧм кывъяс ("тэ верман видлыны ...", "тэныд позьӧ вӧчны...", "унаӧн гӧгӧрвоӧны, ...");

4. Аслыд колӧ эскыны висьталанторлы. Оз ков пыртны сёрниыд "гашкӧ" кыв;

5. Вомъёртыдкӧд оз ков сёрнитны гора, пинясьны; колӧ синмас видзӧдны, кинад петкӧдлыны да висьтавны ас опыт;

6. Быть колӧ ошкыны сёрнитысьтӧ.

Сёрнитан нырвизьяс тӧдмалӧм бӧрын психолог медводз вӧзйис юксьыны ставныслы кык морта котыръяс вылӧ да разӧдіс налы "ворсан ситуацияяс".

Со ӧтиыс на пиысь: "Ті сетінныд каганытӧ Коми национальнӧй гимназияӧ. И кӧсъянныд, медым сылӧн сэні вӧлі ёрт. Тӧдсаяс сэтчӧ челядьсӧ сетны оз кӧсйыны. Мый ті верманныд вӧчны?" Таысь ӧтдор "ворсігмоз" тыдовтчис, мый вомъёртлӧй кагаыс комиӧн оз сёрнит, батьыс украинеч, мамыс роч. Тайӧ сьӧктӧдіс уджсӧ.

Вочакыв кутысьлы ковмис корсьны уна аргумент, медым эскӧдны мортсӧ велӧдчыны Коми национальнӧй гимназияын. Медшӧрыс на пиысь:

1. Гимназияын эм позянлун велӧдны коми "кыдзи чужан кыв" и "кыдзи каналан кыв" уджтасъяс серти;

2. Конкурсъясын бура петкӧдчӧмысь позьӧ шедӧдны шойччан лагерӧ путёвка;

3. Гимназия сьылан котыркӧд позьӧ сӧвмӧдны сьылан сям, гижны сьыланкывъяса диск, гастролируйтны;

4. Гимназияын велӧдчӧны ӧти сменаӧн, мый уналы кивыв. 

Мукӧд ворсан ситуацияыс: кага оз кӧсйы велӧдны коми кыв; кага оз кӧсйы мунны сиктӧ, и с.в.

Кывкӧртӧдъяс пыдди гижим аслыным, мый сетӧ коми кыв тӧдӧмыс мортыслы да юксим ӧта-мӧдкӧд, кыдзи коми кыв тӧдӧм отсаліс дзик нин пикӧ воӧмаяслы петны сьӧкыдлунъясысь.

Та кадӧ кагульничаяс, Мария Игушева да Марина Лопырева, веськӧдлӧм улын челядь вӧчасисны Космонавтика лункӧд йитӧдын.

Ичӧтджык нывпоснилы отсасисны педколледжысь студентъяс - Василина Зайкова да Алина Лодыгина.

Артмисны космосын лэбалысь со татшӧм ракетаяс - а гӧгӧрыс кодзувъяс, планетаяс:

Ӧтувъя уджӧн лои паньяс йылысь сьыланкыв велӧдӧм. Челядь да бать-мам и сьылісны, и паньясӧн гольӧдчисны. Висьтавнытӧ дыр, видзӧдам видео:

Воддза паныдасьлӧмъясыс: медводдза, мӧд да коймӧд.

Витӧд паныдасьӧмыс ода-кора тӧлысь 20-ӧд лунӧ 11 чассянь Ёртасян керкаын. Тайӧ лоӧ проектлӧн медводдза юкӧныслы кывкӧртӧдан паныдасьлӧм. Унджык юӧр лыддьӧй проектлы сиӧм "КЫВ ПОЗ" котырысь Контактын.

"Кыв поз" проект олӧмӧ пӧртӧ "Коми войтыр" ӧтмунӧм Коми республикаса национальнӧй политика министерство отсӧгӧн да "Лукойл" сьӧм вылӧ.