Шойччи ли уджалі

«Кыдзи шойччин? Кыдзи гожӧмсӧ коллялін?» Тадзи кымын юасьӧ быдӧн, кодкӧд паныдася отпускалӧм бӧрын. Сідз нин артмӧ наукаад уджалысьыдлӧн, мый дзик шойччӧм некор оз артмы.

Таво шойччи Коми муын, некытчӧ эг ветлы. И эм талы ӧти ыджыд помка. Колян вося Сьӧд саридз дорын гожйӧдчӧм-купайтчӧм дзик сконйыштіс ставнымӧс - висьмӧдіс челядьӧс, и шойччӧм пыдди сӧмын бурдӧдчим сэні, да и локтӧм бӧрын тшӧтш.

Чуймӧдіс Сочиса Адлерад, мый выль керкаясысь лёк дукыс-ваыс кывтӧ каналъясті юясӧ, а сэсянь - веськыда купайтчанінъясӧ. Бӧрти ӧтуввезйын мукӧдыслысь лыддьывлі, мый Сьӧд саридзын шойччӧм пыдди тшӧтш ковмӧма бурдӧдчыны (весиг бурдӧдчанінӧ водӧмӧн). А ӧти мам ӧтуввезйын дасьтӧма петиция, медым бурмӧдісны санитарно-эпидемиологическӧй ситуациясӧ Сочи гӧгӧрын (кырымалӧма вӧлі некымын дас морт сӧмын). Ӧдвакӧ мыйкӧ вежсяс, ӧд тайӧ кивыв и шойччӧм да туризм пыр сьӧм перйысьяслы, и фарминдустриялы. Тайӧ ыджыд да няйт помӧйкаас сэсся висьӧм кӧвъявны ог кӧсйы.

И сідз, шойччи Коми муын, Висер вожын. Удитышті и му вылын копрасьыштны, и видз вылын отсасьыштны - мӧс видзысьясыд эмӧсь на.

Гожӧмнас жӧ збыльмӧдім коми йӧзкостса ворсӧмъяс йылысь проект. Водзвыв сиктса челядькӧд дасьтысим - бедьяс вайим, чурка помъяс вундалім, чагторъяс лӧсалім. Ме велӧдышті зонкаясӧс ворсны. А сора (июль) тӧлысь 22 лунӧ Выльыб грездын снимайтісны коми йӧзкостса ворсӧмъяс йылысь фильм. Сыктывкарсянь воліс кинорежиссёр Г.П. Маркова. Медводз ныв-зон асьныс ворсісны «Згалӧ-згалӧысь», а сэсся ме петкӧдлі налы важъя ворсӧмъяс – «Поп вӧтлӧм» да «Чиркъясьӧм». Снимайтім кымӧра поводдя дырйи, корсюрӧ буситіс. Жаль, мый шондӧдіс съёмкаяс бӧрын нин. Кинотӧ, дерт, сёрӧнджык видзӧдам, но челядьыслы ӧні нин нимкодь сыысь, мый найӧс петкӧдласны фильмын.

Поводдяыд Комиад таво вӧлі эз сэтшӧм бур, кыдзи колян во. Уна удж урӧс поводдяыд падмӧдіс, но век жӧ купайтчыштнытӧ удиті, кор вежон кымын комын градус вӧлі. Челядьыдлы тай мыйлакӧ эз вӧв кӧдзыд – оз кӧсйыны петны васьыд.

Унаысь лэччылі Висер ю бокӧ чери кыйны. Челядьлы вӧлі вайӧма ичӧтик пыж, медым сы вывсянь кыйсисны: асьныс кыясны, сэсся пызьӧн жаритӧмӧн сёясны. Мукӧддырйи Ёгор пикӧд тайӧ пыжнас петавлім ю шӧрӧ шатинӧн кыйсьыны. Джын часнад унаыд оз шед, но каньнымӧс вердлывлім.

А сэсся Рита нылӧй кутіс мырдӧн вӧзйысьны чери кыйны. Босьтас нидзув да чери дозмукъяс и миянкӧд вадорӧ лэччӧ. Ковмис и пыжӧ пуксьӧдны, и шатин киас сетны. А сэсся нин кыйӧм чериыскӧд ворсӧ – кутӧ, видлалӧ, мольӧдӧ.... «Акула» пӧ...., «чери» шуны оз на артмы да.

Медводдза лунсяньыс Бикинь каньным ӧтлан кутіс лэччывны вадорӧ чери кыйны. Водас Ёгор пилӧн шатин вылӧ да мургӧ, буракӧ, нимкыв лыддьӧ, медым уна шедӧ да ставсӧ сылы сетасны. Кыйӧм черисӧ пыжас и ньылалӧ. А ӧти лунӧ ыджыдкодь кельчи перйис-кыйис дозмукысь да тэрыба пышйӧдіс чой паныд. Миян сӧмын серам петіс татшӧм тшаплунсьыс.

Ветлі став семьяӧн чужан сиктӧ, Кулӧмдінӧ, рӧдвужӧс видлыны. Локтӧмсяньыс вӧзйисны ветлыны чери кыйны. Мӧдӧдчим куимӧн: ме, Ёгор пиӧй да Саш зять. Эжваті пӧжӧн кайигӧн шыбитім спинингъяс. Ӧтисӧ Ёгор кутіс. Медводдзаӧн сылы чериыс и шедіс. И эз кутшӧмкӧ горш ёкыш ли сир, мый медся тшӧкыда овлӧ спинингӧн кыйсигӧн, а - пӧддяз. А Ёгорлы кутшӧм нимкодь! Медводдзаысь татшӧм ыджыдыс сылы шедіс!

Катам пыжӧн, да чуймала, кыдзи вежсьӧма Эжваным: берегын гежӧд пыжъяс, турунзьӧма да бадьсялӧма, йӧзтӧм - абу челядьдырся кодь, кор ӧтилаын ӧтпырйӧ купайтчим морт кызь, шонтысим бипур дорын, варччылім молльӧн кылӧдӧм керъясӧдз. Ылыстчӧма Кулӧмъю вомыс - важлаас кольӧма вӧсни вис; ӧні ю вомыс кык километраӧн вылынджык, кӧні писькӧдлӧма выль туй. А Дзоля Мӧдлапӧв, кӧні купайтчывлім, дзикӧдз вӧрсялӧма. Каям пыжӧн, да шензя вежсьӧмъясыслы! Катлім Куръяӧдз, жаритмӧн чериыд шедіс миянлы.

Висер вожын, кад воис да, тшакла ветлывлім. Пуксям пикӧд велосипедъясӧ да журкнитлам. Видз боксьыд некымынысь вотчылім. А коркӧ тшакла кутіс Рита нылӧй вӧзйысьны - мырддис ыджыдджык вокыслысь пурт, пасьтасис. Мамыслы ковмис сыкӧд ветлыны матысса вӧрдіас. А кор ми Ёгоркӧд воим велосипедӧн, тыдовтчис, мый Риталӧн тшакыс миянысь унджык.

Мойвиис таво ӧтчыдысь мырпом вотны. Ылӧкодь нюрас подӧн ковмис мунны, но ведраыд тырис менам. Вотӧсыс дзик нин кисьмӧма вӧлі, кӧнсюрӧ кок йылас косьмыштӧма. Колян во та мында тусьыд эз сюрлы.

Чӧдтӧ воті жӧ, ветлі некымынысь недыр кежлӧ, та вӧсна и вайи муртса. Ёгор тшӧтш ӧтлан вотчис, кымын да кыдзи вермис. Шуим, мый чӧдсьыд сьӧм вылас ньӧбам смартфон. Карӧ воӧм бӧрын збыльмӧдім кӧсйӧмсӧ.

Тані, дерт, колӧ пасйыны, мый вотӧс вузалӧмнад сиктсаясыд бура "озырмӧдчӧны". Кор чӧдыд донсяліс, кодсюрӧ 3 сюрс дон вотчӧ быд лун.

А кор сюрлі кад "шойччӧмысь" - уджалышті. Ӧтпырйӧ куим небӧг дасьті - ӧкті статьяяс, редактируйті, корректируйті и с.в. Кадыс лоас да быд небӧг йылысь торйӧн на гижышта блогйӧ.

Научнӧй уджъяс гижӧм могысь корси материал - кывзі аудиозаписьяс, расшифруйті тавося гижӧдъяс. Ог кӧ дышӧдчы, Шойнатыса челядь фольклор серти унатор на позяс висьтавны бӧртиджык и туясьӧмъясын, и блогйын.

Ӧти кывйӧн, бура шойччи, кыдзи и век. Мӧд нога оз и вермы лоны (сиктсаыдлӧн)!