Нёбдінса Витторлы паметникыс киссянвыйын

Сыктывкарын абу этша паметник, мый колӧ дзоньтавны да бурмӧдны. На лыдын - коми гижысь, драматург, шылад тэчысь да общественник Нёбдінса Витторлы (1888-1943) паметник, мый сулалӧ Драма театр бокын. Ылісянь (либӧ ылӧсас) видзӧдігӧн нелючкиыд оз тыдав, но матысяньыд казялан, мый нимсьыс чегӧма нин медводдза шыпасыс:

Памятниксӧ восьтӧма 1994 вося август 21 лунӧ. Скульпторыс В.А. Безумов, архитекторъясыс - А.П. Толмачева, Н.А. Тюлюкова да М.А. Шахова. Памятниксӧ восьтны волӧма коми гижысьлӧн Инесса нылыс.

Кытшовтны кӧ скульптурасӧ, казялам унасикас потӧмин. Со фундаментсьыс тыдалӧ пӧвтор:

Пӧвторъясыд, дерт, важӧн нин сісьмисны, а сідзкӧ скульптура пӧрӧм абу нин ылын:

Киссьыштӧма сідзжӧ паметникгӧгӧрса плитаясыс. Кӧнкӧ плитасӧ нетшыштӧмаӧсь нин:

Плитатӧм мемориал вылад видзӧдны сьӧкыд. Вылыс плитаыс кӧ абу, улісаясыс да бокисаясыс тшӧтш регыд вальдасны:

Жугласьыштӧмаӧсь паметник дорӧ нуысь тшупӧдъясыс:

Виктор Савин кувлӧма 1943 вося моз тӧлысь 11-ӧд лунӧ дзескыдiнын Ылi Сибирын: Томск кöрттуйлöн Итатка станциясянь неылын — Прикулька лагпунктлöн лазаретын. Дзебаніныс стöча абу тöдса. 1955 воын сылысь нимсö бӧр бергӧдiсны коми йӧзлы.

Тайӧ паметникыс зэв тӧдчана казьтыліг-кодралігӧн. Унаысь нин аддзывлі, мый Нёбдінса Виттор паметник водзын ӧзтывлӧны сись, неминучаясын кулӧмалысь сувтӧдӧны фотосӧ, казьтылӧны шонъянаясӧс. 

Локтан во тырӧ 130 во Виктор Савин чужӧмсянь. Тӧдса нин, мый "Коми войтыр" ӧтмунӧмса Кӧрткерӧс представительство тавося вӧльгым тӧлысь 21-ӧд лунӧ кӧсйӧ нуӧдны коми войтырлысь районса конференция да сины сійӧс Нёбдінса Витторлы.

Чайта да, Сыктывкарын паметник мичмӧдӧмыс тшӧтш зэв тӧдчана Нёбдінса Витторлы 130 во тыригӧн.

Кутам эскыны, мый власьт босьтчас тайӧ уджас оз кӧ сэтшӧм жӧ тэрыба, кыдзи Сыктывкарын Куслытӧм би дзоньталігӧн (Ставроссияса фронт элясис, а вежон мысти нин аддзӧмаӧсь сьӧм да босьтчӧмаӧсь уджӧ), кӧть нин во чӧжӧн помаласны юбилей кежлас. Видзны йӧзлысь бур паметь - миян мог.