четверг, 8 июня 2017 г.

«Коми велӧдысь – 2017» республикаса II конкурс йылысь


«Коми велӧдысь» республикаса II конкурс кежлӧ дасьтысьӧм меным пансис 2017 вося тӧвшӧр тӧлысьын, кор «Коми войтыр» ӧтмунӧмсянь пырӧдчи оргкомитет уджӧ. Та кындзи, зіли жюриын (экспертъяс лыдын). Медводз тӧдмаси конкурсӧ мӧдӧдӧм уджъясӧн, бӧрйи мукӧдыскӧд ӧтвылысь велӧдысьяссӧ, а сэсся донъялі налысь петкӧдчӧмсӧ очнӧй тшупӧдас нин – ода-кора тӧлысь 4-5 лунъясӧ.



Ставнас 2017 вося конкурсӧ пырӧдчис 18 велӧдысь да 6 кага видзысь. Эз вӧвны заявкаяс Удора, Изьва, Княжпогост, Койгорт, Чилимдін да Вуктыл районъясысь, Сосногорск карысь. Сэк жӧ, мукӧдласьыс колана дорсьыс унджыкӧн шыӧдчӧмаӧсь (Вӧркута, Луздор да Сыктывдін районъяс).


Медводз синмӧ шыбитчис сійӧ, мый конкурсӧ пырӧдчӧны ёнджыкасӧ найӧ, кодъяс велӧдӧны комисӧ кыдзи каналан кыв. Сӧмын Кулӧмдін район вӧзйис ӧтиӧн коми кыв велӧдысьӧс да кага быдтысьӧс, кодъяс ассьыс уджсӧ нуӧдӧны чужан кывнас.


Сы вӧсна мый кыв велӧданногын ачымӧс ог лыддьы специалистӧн, тшӧкыдджыка донъялі мукӧдтор – гижӧда кывйӧн вӧдитчӧм, ӧшыбкатӧг гижӧм да сёрнитӧм, челядь дорӧ сибыдлун петкӧдлӧм. Медводдза тшупӧдас нин тыдовтчис, мый КОМИ КЫВ ВЕЛӦДЫСЬЯСЛӦН эм ыджыд тырмытӧмтор – оз быдӧн вӧдитчы Коми Республикаса Юралысьлӧн Тшӧктӧмӧн вынсьӧдӧм «ӧ» да «і» кириллица шыпасъясӧн. Та пыдди коми велӧдысьяс асланыс эссеясын да презентацияясын вӧдитчӧны мукӧд (латиница) анбурысь босьтӧм символъясӧн (шуам, «ȍ» «ő», «ŏ», «í»), мый зэв ёна дзерӧдӧ. Мукӧдыс весиг кедзовтӧны «ё» шыпас (шуам, «ерта-ерт»), кӧть сійӧ став клавиатураас эм. Быд велӧдысьлы колӧ вӧзйыны, меным пуктісны асланыс компьютеръясӧ, смартфонъясӧ и с.в. коми раскладкасӧ, мый дасьтӧма Фин-йӧгра кывъяслы информационнӧй отсӧг сетан регионкостса лаборатория. Велӧдысьяслы колӧ восьлавны кадыскӧд ӧтвылысь, петкӧдлыны пример асланыс быдтасъясыслы.


Эг этша велӧдысьясӧн ыстӧм уджъяссьыс аддзи кыв гижанногын ӧшыбкаяс («гажкӧ», «велӧдым», «дзоридзъяс», «енежын», «куртчасьӧ», «сентябрь», «стен вылын», «ветлыдлӧ корабль вылын», и с.в.). Та вӧсна кыптӧ юалӧм: асьныс кӧ оз тӧдны правилӧяс, мыйӧ найӧ велӧдӧны ныв-зонсӧ? Коми кыв велӧдысьыдлы оз сӧмын ков велӧдны, но и аслыс велӧдчыны – а та могысь колӧ комиӧн гижны газет-журналӧ, медым правилӧясыд эз вунны, да, дерт жӧ, лыддьыны небӧгъяс да пресса.


Кӧть и бӧрйылім 12 мортӧс, Сыктывкарӧ конкурс вылӧ воисны дасӧн – 6 велӧдысь да 4 кага видзысь. Вермасьӧмыс муніс ӧта-мӧдӧс пыдди пуктӧмӧн, ёрта-ёртлы отсасьӧмӧн. Тӧдчӧ вӧлі, мый велӧдысьяс зілисны эз сӧмын ассьыныс опытсӧ петкӧдлыны, но и мукӧдыслӧн выльторъясӧн тӧдмасьны. Методика боксянь ён урокъяс петкӧдлісны А.А. Супрядкина (рочысь комиӧ пырӧм кывъяс), Е.М. Бутарина (компьютер технология отсӧгӧн коми сьыланкыв велӧдӧм), Е.И. Шевелева (рӧдвуж терминъясӧн тӧдмӧдӧм), В.М. Королёва (важся коми вӧралан календарӧн да обычайясӧн тӧдмӧдӧм).


Челядь видзанінса да школаса уджалысьяслӧн петкӧдчӧмысь тыдовтчис, мый налы ковмӧ топыдджыка уджавны быд кагакӧд, став сям-кужӧмсӧ пуктыны, медым быд урок вӧлі яръюгыдӧн да водзӧсаӧн.


Конкурс дырйи торйӧн нин бура артмис гӧгрӧс пызан котыртӧм (нуӧдіс Г.Ф. Хатанзейский) – эз дзик пыр, кӧнкӧ минут дас мысти сӧмын, коми кыв велӧдысьяс варовмисны, тӧдмӧдісны асланыс видзӧдласъяснаныс «Чужан кыв тӧдысьыд быдмӧ чужан му дорйысьӧн» тема серти.


Медводдза лунас нин водзӧ петісны кыкӧн, найӧ и лоины кык лунся ордйысьӧм бӧрын вермысьясӧн – Сыктывдін районса Выльгортысь 8-ӧд №-а садйын шылад велӧдысь Елена Бутарина да Луздор районса Сернӧсысь коми кыв велӧдысь Алёна Супрядкина. Таво эз вӧвны вермысьяс серти дыр вензьӧмъяс, кыдзи колян во вӧлӧма. Бӧрйим медбуръяссӧ, кодъяс асланыс уджнас петкӧдлісны челядьӧс коми кывйӧ велӧдӧмын ыджыд мастерство.


«Коми велӧдысь» республикаса II конкурс вӧлі котыртӧма да нуӧдӧма вылі тшупӧдын. Тані колӧ ошкыштны Велӧдысьясӧс сӧвмӧдан институтысь кык юкӧдлысь уджсӧ – Этнокультурнӧй велӧдӧм сӧвмӧдан шӧринлысь (веськӧдлысь – Татьяна Владимировна Якубив) да школаӧдзса велӧдӧмын национальнӧй мытшӧдъяс венан лабораториялысь (веськӧдлысь – Зоя Васильевна Остапова). Зэв бур, мый конкурссӧ позис видзӧдны ӧтуввез пыр – статистика серти, кык лунӧн ордйысьӧмсӧ видзӧдӧмаӧсь матӧ 700 морт.

Нимкодь, мый 2017 воын конкурс нуӧдӧм могысь Йӧзӧс велӧдан, наука да том йӧз политика министерство вичмӧдӧма сьӧм, а министр воліс чолӧмавны конкурсӧ пырӧдчысьяӧс. Век жӧ виччысям, мый конкурссӧ коймӧдысь нуӧдігӧн тӧдчӧмӧн содтасны сьӧмсӧ.

Комментариев нет:

Отправить комментарий