суббота, 13 мая 2017 г.

Ёма-ё-disco

Коми семьяяслӧн "Шуда котыр" клуб нуӧдіс ставмирса семья лунлы сиӧм гажа рытпук. "Ёма-ё-disco" ним улын йӧктана-ворсана гажыс муніс Сыктывкарса коми культура шӧринын да ӧтувтіс кызь сайӧ мортӧс.
Челядьӧс паныдаліс Ёма (ворсіс Любовь Ширяева) - выльшасьысь, тшапитчысь, ӧнія кадкӧд восьлалысь. Сылӧн киас ачпас бедь - быдӧнкӧд кӧсйӧ вӧлі фотографируйтчыны.
Ёмаыд ныв-зонмыдлы разӧдіс зэв бур "вреднӧй" сӧветъяс (буракӧ, Григорий Остер гижыськӧд уна во нин тӧдса): оз пӧ ков мукӧдыскӧд чолӧмасьны, колӧ пӧ мышкӧн налань сувтны; ёртъяс весьтад колӧ серавны, кор сыкӧд мыйкӧ лёктор лоӧма, и с.в.

Пӧттӧдзыс челядьтӧ да налысь бать-мамсӧ Ёмаыд ворсӧдіс да йӧктӧдіс. Юргисны коми сьыланкывъяс (диджеяліс Ольга Данилович); шойччытӧг нывкаяс да зонкаяс ворсісны. Зэв тешкодь вӧлі аддзыны, мый "Ёма да бӧжысь" ворсігӧн Ёма дорӧ бӧжӧн пысасис сӧмын ӧти морт, а мукӧд челядьыс кутчысисны Людмила Камбалова дорӧ.

Зэв азыма дзолюкъясыд босьтчисны тӧдмавны, мый жӧ Ёмаыд сайӧдӧма аслас кудйӧ да кыдзи перйӧмторйыс йитчӧма Ёмакӧд (сир, зуд, зу). Колана вочакывйысь челядьыдлы вичмис юмовтор.



Удитісны ныв-зонмыд и асьсӧ - Ёмасӧ - нерны. Кывбурӧн нимтӧм бӧрын котӧрӧн пышйылісны-сайӧдчылісны бать-мам мыш сайӧ, сэтысь пӧ Ёмаыдлы кыясьны оз позь. 

Коми республикаса Национальнӧй небӧгаин ныв-зонлы дасьтӧма вӧлі серпаса юржуглантор. Алёна Логинова вӧзйис тӧдмавны фотография серти тусь да сылысь дзоридзьяссӧ, чери нимъяс, нянь быдтанног,  ӧткодявны важся да ӧні эмторъяс (шуам, пылесос да гӧлик).


Рытпукыс ёна ыззьӧдіс челядьтӧ: уджтас помасьӧм бӧрын найӧ бура дыр на асьныс ворсісны, а верстьӧяс дасьтісны матысса кад вылӧ планъяс.

Вӧзъя видзӧдны "Ёма да бӧж" ворсӧмлысь неыджыд юкӧн:
Пасъя, мый "Шуда котыр" клуб уджалӧ Сыктывкарын кык во нин. Став гажсӧ нуӧдӧ комиӧн. Матысса мероприятиеяс йылысь позьӧ тӧдмавны Контактын "Шуда котыр" группаысь.

Комментариев нет:

Отправить комментарий