среда, 31 мая 2017 г.

Сьӧдкыркӧтшын тупкисны фестиваль

Дасӧдысь нин нуӧдӧма "Кужам сьывны, кужам и ворсны" фестиваль - сійӧ ӧтувтӧ сьылысь, йӧктысь да ворсысь котыръяс. Быд во сійӧс котыртлӧны сыктывкарбердса посёлокъясын, медым паськӧдны коми кыв юргӧмсӧ. Таво фестиваль юргис Сьӧдкыркӧтшын да вӧлі сиӧма нималана коми гижысь Геннадий Анатольевич Юшковлы.


Сьӧдкыркӧтшыд, коді оз тӧд, - Эжва ю сайын. Сыктывкарсянь медводз колӧ автобусӧн мунны 9 километра Алёшино вуджӧдчанінӧдз, а сэсся вуджны юсӧ. Ми веськалім паром мунӧм кежлӧ. Ывлаыд кӧдзыд - ичӧтик каютаад ставныс эз тӧрны. Уналы ковмис вӧр-ванас нимкодясьны, сӧстӧм сынӧд апавны. 

Сьӧдкыркӧтшыс артмӧма 1940-ӧд вояс шӧрын, кор татчӧ лӧсьӧдӧмаӧсь запань. Сэні уджалӧмаӧсь пукалӧмаяс: немечьяс, "власовечьяс", кулакалӧмаяс и мукӧд. 1970-ӧд вояссянь овмӧдчаніныс вӧлӧма посёлок сӧветса шӧринӧн, тані олӧма 2,5 сюрс гӧгӧр морт.

Тайӧ кадсяньыс кольӧма кык судтаа Культура керка, кӧні и нуӧдім фестивальсӧ.

Весиг пытшкӧссяньыс ставыс индӧ сы вылӧ, мый архитектураыс абу татчӧс: кык судтаа, колоннаяса, балкона...


Фестиваль кежлӧ дасьтӧмаӧсь посёлокын олысь гижысьяслы сиӧм пызан. Тані олӧ коми гижысь Валентина Иванова да нӧшта ӧти асшӧр роч кывбуралысь, кодлӧн быд во петӧны неыджыд небӧгторъяс.

А тайӧ джаджас - Геннадий Юшковлӧн небӧгъясыс:

Нӧшта ӧти пызан - олӧма мортлӧн ас киӧн вӧчӧмторъяс:

А со и асьныс - коми ру кыпӧдысьясыс:







Жаль, но посёлокысь йӧзыс вӧлі этша:
Геннадий Юшковӧс казьтыштны волісны коми да роч гижысьяс: лыддисны кывбуръяс, морт йывсьыс висьталыштісны:

Петкӧдчисны Коми республикаса вужвойтырлӧн шылада-драмаа театрысь ворсысьяс: 
Кӧдзыд поводдя вылӧ видзӧдтӧг юсайса Сьӧдкыркӧтшӧ волісны Геннадий Юшковлӧн гӧтырыс да нылыс. Этша сёрнитісны, но ошкисны, мый ставсӧ вӧчӧма сьӧлӧмсяньыс.  
Сьӧлӧм вылас воис сиктса гажыс и Валентина Ивановалы:
Фестиваль вӧлі нуӧдӧма бӧръяысь. Та йылысь юӧртім сценасянь, кӧсйысим лӧсьӧдны выльджыктор.

Фестивальлысь символсӧ - утка-чӧжсӧ - колльӧдім да лэдзим уявны культура керка бокса тыӧ. Некыдзи эз кӧсйы мунны - бӧр косіс. Гашкӧ, кутшӧмкӧ пас сетіс ставнымлы?!

Бӧртиджык тай ӧтпырйӧ некымынӧн меным шуисны, мыйла пӧ сэсся он кӧсйӧй водзӧ нуӧдны фестивальсӧ? Карбердса посёлокъясын пӧ тайӧ фестивальяс бӧрас ёнджыка кутіс юргыны коми кыв, ӧтувтіс сьылысь-йӧктысь коллективъяс, кӧні абу сӧмын комияс, но и мукӧд кывйӧн сёрнитысьяс.

Кыдзи и водзынсӧ, фестиваль помасьӧм пасйим ӧтувъя пызанӧн. Быдӧн вайис аскӧд нуръясянтор - бӧрйисны медчӧскыдсӧ:

Сьӧдкыркӧтшсянь юсӧ вуджим "Усть-Сысольск" выль катерӧн: шоныд, ставным тӧрім.

А сыӧдзыс лёкысь лымъяліс, муртса туйыс вӧлі тыдалӧ:
"Кужам сьывны, кужам и ворсны" фестиваль котыртісны Сыктывкарса коми культура шӧрин, Сыктывкарса администрацияысь культура юкӧн, "Коми войтыр" ӧтмунӧмса Сыктывкарса представительство.

"Коми войтыр" ӧтмунӧмсянь отсӧгла шыӧдчылім некымын предприятие да морт дорӧ. Воча муніс сӧмын КПРФ-лӧн Сыктывкарса горком, мыйысь коммунистъяслы шуам "АТТЬӦ"!

Комментариев нет:

Отправить комментарий