понедельник, 8 мая 2017 г.

Трёхозёркаын паныдаси тылын уджалыськӧд

"Коми войтыр" ӧтмунӧмлӧн Исполком таво юӧртіс Айму вӧсна Ыджыд тышын Вермӧмлы сиӧм акция. Вӧзйим ветлыны войнаса ветеранъяс дорӧ да чолӧмавны найӧс праздникӧн. Таво ме ветлі сыктывкарбердса Трёхозёрка посёлокӧ, кӧні олӧ 91 арӧса тылын уджалысь.


Анна Алексеевна Чувьюрова чужӧма 1926 воын Кулӧмдін районса Дереваннӧй сиктын. Водз кольӧма бать-мамтӧгыс. Колхозын уджыштӧм бӧрын мунӧма ыджыд чой дорас Кӧджпомӧ, охранникалӧма Выльгортса поштаын. 22 во уджалӧма сплавын, сэсся кочегаралӧма Трёхозёркаса челядь видзанінын.

Зэв бура помнитӧ Вермӧм лун йылысь юӧртӧмсӧ. 1945 воад пыр жӧ котыртӧмаӧсь Сыктывкарын парад, мунӧмаӧсь Сӧветскӧй да Киров уличаясті. Йӧзыс пӧ кутӧмаӧсь шуны: Слава Богу пӧ, ӧні сэсся вӧльнӧй нянь лоас.

Война вылӧ сылӧн усьӧма куим вок - Иван, Николай да Миша.

Анна Чувьюрова дорӧ ветлі Ёгор пикӧд. Кӧсйи эськӧ сылы петкӧдлыны ытваа Сыктыв да Эжва юяс, ойдӧм посёлоксӧ, гуляйтӧдны теплоходӧн (билетысь оз ков мынтысьны), но та кындзи сылы ковмис кывзыны война кадся курыд кӧра олӧм йылысь висьтасьӧмсӧ.

Анна Алексеевна мӧдӧдіс ме пыр зэв ыджыд чолӧм аслас племянникыслы, кодӧс видзлӧма на - нималана коми шылад тэчысь Василий Чувьюровлы (Кузьнеч Вась). Аддзыланныд кӧ сійӧс меысь водзджык, висьталӧй та йылысь. Анна Чувьюровалӧн батьыс кузьнечавлӧма да, сійӧс тшӧтш сиктсаясыс шулӧмаӧсь Кузьнеч Аннаӧн.

Кӧсъя аттьӧ шуны Трёхозёркаса библиотекаын уджалысь Ирина Николаевна Нестеровалы, коді тӧдмӧдіс тайӧ мортыскӧд.

Комментариев нет:

Отправить комментарий