Коми му туялан котырлы 95 во

Коми му туялан котырлы таво тырис 95 во. Такӧд йитӧдын котыртлім ставроссияса конференция. Чукӧрмыліс морт 70.

Конференция йылысь пасйӧдъяс эмӧсь нин ӧтуввезйын. Содта некымын фотография - тайӧ йӧз, кодъяс дон босьттӧг корсьысьӧны лун и вой, архивъясысь перйӧны выль материалъяс, сёрнитӧны выль восьтӧмторъяс йылысь конференцияяс дырйи.

Сёрнитісны Коми мулӧн история да культура йылысь, коми кыв, фольклор да литература йылысь. 

Чужан му туялысь пиын ёнджыкасӧ олӧма нин йӧз. Висьтасьӧны и матысса рӧдвуж, и сикт история, и нималана йӧз йылысь.
 

Унджык кадсӧ уджалім Кыв, литература да история институтын, но ӧти секция вӧлі И.А. Куратовлӧн Литературнӧй музейын.
 

Нимкодь вӧлі аддзыны ставроссияса конференция дырйи Искусствояс гимназияысь велӧдчысьясӧс. Ставнас ӧкмыс морт, волісны асланыс велӧдысьясыскӧд. Быдӧнлы вичмис сертификат, а нёль медбур докладысь - Диплом да козин пыдди небӧг.
 

Вӧзйим налы мӧдысь кежлӧ дасьтыны сёрнисӧ комиӧн, а презентациясӧ - рочӧн (медым мукӧдыс гӧгӧрвоисны).

Коми му туялан котыр бӧрйис аслыс выль веськӧдлысьӧс. Сійӧн лои история наукаясса доктор, Коми Республикаса веськӧдлыны велӧдан да служба академияысь профессор Анна Капитоновна Гагиева. 1994 восянь сійӧ вӧлі Сыктывкарса университетын фин-йӧгра факультетса деканӧн. 

Матысса кад вылӧ индӧма план. Кутам уджавны водзӧ.