воскресенье, 15 января 2017 г.

Коми кыв Кулӧмдінын: лоас оз?

"Коми войтыр" ӧтмунӧмлӧн Исполком шуӧм серти пекничаӧ ветлім Кулӧмдінӧ. Помкаыс вӧлі ыджыд - Кулӧмдінса школаын коми кыв кыдзи чужан кыв велӧдӧм. 



Кулӧмдін район лыддьысьӧ медкоми район пиысь ӧтиӧн. Коми кыв велӧдӧмын кӧ колӧ вӧлі вайӧдны пример, ыстысьлісны эжвайывсаяс дорӧ. Но бӧръя воясас коми кыв кыдзи чужан кыв дугдісны велӧдны Кулӧмдінса шӧр школын.

"Коми войтыр" пырысьяс кындзи карсянь волісны Кулӧмдінса землячествоысь нырщикъяс, коми кывйысь небӧг дасьтысьяс; а сиктсассяньыс - "Коми войтыр" ӧтмунӧмлӧн Кулӧмдінса представительствоӧ пырысьяс, районса велӧдан юкӧнысь уджалысьяс, сиктса челядь видзанінъясӧн веськӧдлысьяс, Кулӧмдінса школаса директор да бать-мам.

Чуймӧдіс ӧти нывбаба - бать-мам комитетӧн пӧ веськӧдлӧ школаас. Ён гӧлӧсыс да ӧтнас и паныд муніс коми кыв велӧдӧмлы: кодлы пӧ тайӧ кывйыс колӧ, тайӧ пӧ сьӧкыд кыв - 16 вежлӧг да нӧшта на 8 содтӧд; мыйла пӧ коми кыв велӧдігӧн колӧ юкны классӧ, а роч кыв велӧдігӧн оз?

Бур мый сійӧ ӧтнас вӧлі татшӧмыс. А со Александр Логинов дорйис коми кывсӧ, но корис, медым общественносьт дорйис ичӧт школаяс, эз вывтіасьны вылькывъясӧн вӧдитчигӧн.



Нимкодь, мый карсянь воысьяс петкӧдчисны ӧтувъя командаӧн да видлісны гӧгӧрвоӧдны, мыйын коми кыв тӧдысьлӧн выныс.

Помланьыс вынсьӧдім гӧгрӧс пызанлысь Шуӧмъяссӧ, кӧні гижим, мый Кулӧмдінса школалы колӧ корсьны челядьӧс да восьтыны медводдза класс либӧ котыр, коді кутас комисӧ велӧдны кыдзи чужан кыв; колӧ нуӧдны бать-мам пӧвстас гӧгӧрвоӧдана удж,  медым тӧдісны, мый эм позянлун чужан кывсӧ велӧдны; нуӧдны паныдасьлӧмъяс нималана йӧзкӧд, кодъяслы коми кыв тӧдӧмыс сетіс позянлун сӧвмӧдны асьсӧ.

ГБ (Гижӧм Бӧрын): Тайӧ гӧгрӧс пызан йывсьыс "Комиинформ" юӧр сетан агентствоын петіс гижӧд, мый бара зэв ёна шызьӧдіс йӧзсӧ: матӧ куимсё комментарий Контактын вӧлі кольӧма.

Комментариев нет:

Отправить комментарий