среда, 7 декабря 2016 г.

Коми блогйысь - 2016: кывкӧртӧдъяс

Юркарса коми культура шӧринын ӧшым тӧлысь 6-ӧд лунӧ нуӧдӧма "Коми блогйысь" конкурсын вермысьясӧс нимӧдӧм. Таӧдзыс тӧлысь чӧж блогйысьяслысь уджъяссӧ донъяліс сизим морта жури да ӧтувъя чукӧртчылігӧн ассьыс кывкӧртӧдсӧ протоколаліс.


Мӧдӧдӧм уджъяссӧ донъялісны коми кыв бура тӧдысьяс, ӧтуввезйын бура уялысьяс: Коми республикаса национальнӧй политика министерствоын уджалысьяс Худяева Ольга Ивановна да Коснырева Елена Григорьевна, "Коми войтыр" ӧтмунӧмлӧн сыктывкарса представительствосянь Рассыхаев Алексей Николаевич да Хозяинова Наталья Алексеевна, 
Сыктывкарса коми культура шӧринса уджалысь Сычева Юлия Сергеевна, "Коми му" газетысь журналист Симпелев Павел Иванович да блогйысьны ышӧдысь, коми кыв туялысь Ӧньӧ Лав).

Конкурсӧ мӧдӧдӧма 11 шыӧдчӧм. Гижӧдъяссӧ пуктӧма нимпасъясӧ да донъялӧма таблицаын: журитысьлы колӧ вӧлі быд нимпасын бӧрйыны куим медбур удж да сетны налы 1, 2 либӧ 3 места. Кодлы медуна медводдза места вичмӧ, сійӧ и вермӧ.

Уджъяс донъялӧм бӧрын вермысьясӧн шуӧма: 
1. «Медбур да колана аналитическӧй гижӧд» нимпасын – Евгения Михайловна Лобанова «”МУСЛУН” методика» гижӧдысь;

2. «Лоӧмтор йылысь медбур гижӧд» нимпасын – Наталья Васильевна Дёмина «Тӧдысьяс да ми» гижӧдысь; 

3. «Коми му артмӧмсянь 95 волы сиӧм медбур патриотическӧй гижӧд» нимпасын – Евгения Михайловна Лобанова «Бабӧ, бласлӧвит менӧ!» гижӧдысь (1-дза юкӧн; 2 юкӧн ; 3 юкӧн); 

4. «Медзіль коми блогйысь» нимпасын – Алёна Николаевна Нестерова («Алёна Тувсовъя» блог); 
5. «Блог медбура мичмӧдӧм» нимпасын – Елена Борисовна Рассыхаева («Висервожса ныв» блог).

Конкурсӧ быд пырӧдчысьлы вичмӧдім 2017 во кежлӧ Этнокалендар, а вермысьяслы содтӧд сетім Диплом, сьӧмтор да кыӧм сапӧг:

Аттьӧалам сьӧма отсӧг сетӧмысь ас вылӧ уджалысьясӧс: "Родник" агентствоӧн веськӧдлысь Иван Шаховӧс да "Криптон" компаннияӧн веськӧдлысь Алексей Габовӧс, а сіджӧ Светлана Туроваӧс да Сергей Нестеровӧс ("Югыд-Арт" кысянін).

Вермысьяслы Диплом сетӧм водзын удж донъялысьяс висьталісны ассьыныс видзӧдлассӧ, мый налы сьӧлӧм вылас воис. Та йылысь гижыштӧма нин ӧтуввезйын. "Юрган" телеканал да Надежда Бушенева дасьтӧ "Миян йӧз" телеуджтас (эфирын ӧшым 14 лунӧ).

Локтан во бара на нуӧдам конкурссӧ. Павел Симпелев шуис, мый уджъясыс туянаӧсь, медым йӧзӧдны "Коми му" газетын.

Чайта, локтан во лоӧны выль нимпасъяс, а "Медзіль коми блогйысь" нимпасын вермысьлы содтам сьӧмсӧ некымын пӧв (мукӧд сертиыс). Конкурсӧ позяс мӧдӧдны уджъяс, мый гижӧма 2016 вося вӧльгым тӧлысьсянь. Та йылысь юӧртам содтӧд.

Пукта некымын фото вермысьясӧс нимӧдӧм рытсянь:



Битбоксёр Владислав Канев: вом шыӧн  ворсӧ, шылад тэчӧ


Рыт нуӧдысьяс - Наталья Шахова да Владислав Канев

Мира Валерьянова Чуяшкова висьталӧ национальнӧй политика министерствосянь кыв. Кӧсйысисны 2017 воын отсасьны жӧ.


Наталья Дёминалы козин сетӧ Павел Симпелев

Ольга Худяева

Алёна Нестеровалы козин сетӧ Ӧньӧ Лав

Конкурсӧ пырӧдчысьяс 

Елена Рассыхаевлы козин сетӧ Наталья Хозяинова

Комментариев нет:

Отправить комментарий