пятница, 4 ноября 2016 г.

Блогйысьяслы юӧр

Зэв мисьтӧм серпас - блогйысьясӧс гижны ышӧда, конкурс юӧрта, а ачым кад ог аддзы блоглы. Эг казяв, кыдзи бӧръя кык тӧлысьыс лэбыштӧма. Медым янӧдӧмысь мынны, некымын кыв "Коми блогйысь" конкурс йылысь пасйышта.



Вӧльгым тӧлысь 1-ӧд лунӧ помасис шыӧдчӧмъяс чукӧртӧм. Менам кыдзкӧ эз вӧв майшасьӧм, мый оз ло конкурсӧ пырӧдчыны кӧсйысьыс.

Ставнас 11 шыӧдчӧм воис. Уджъяссӧ нимпасъясӧ (номинацияӧ) йӧрті да тыдовтчис, мый "кӧвъясьӧма" миянлы 11 лыдпас. (Гашкӧ, Коми му - 11 регион, да сійӧн?!) Весиг чӧв олысь блогйысьыс тшӧтш 11 !!!

"Медбур да колана аналитическӧй гижӧд" нимпасын - 11 удж, "Лоӧмтор йылысь медбур гижӧд" - 12 удж, "Коми му 95 во артмӧмлы сиӧм медбур патриотическӧй гижӧд" - бара 11. Медся зіль блогйысьсӧ ковмас бӧрйыны бара 11 морт пиысь, а блог медбура мичмӧдысьӧс - 7-ысь. 


Медым донъялӧмыс вӧлі объективнӧйджыкӧн, журитӧны сизимӧн: тайӧ министерствоын, культураын, музейын, журналистикаын да
наукаын уджалысьяс - коми кыв бура тӧдысьяс. Нимъяссӧ йӧзӧдам сёрӧнджык, а ӧні сетам налы кад донъявны уджъяссӧ.

Водзвыв верма шуны, мый кывкӧртӧдъяс вӧчам ӧшым (декабр) тӧлысь 6-ӧд лунӧ (16.30-ын), чукӧртчылам Юркарса коми культура шӧринӧ нимӧдны вермысьясӧс. Тайӧ йитчӧма сыкӧд, мый  вӧльгым тӧлысь помас уна ыджыд лоӧмтор, на кежлӧ колӧ дасьтысьны, нуӧдны. Вӧльгым 18-ӧд лунӧ Сыктывкарын коми войтырлӧн конференция, 25-ӧдӧ - коми кывъя Сыктывкарса 6-ӧд КВН ("Октябр" шӧринын, волӧй). Ӧшым тӧлысь 1 лунӧ - "Шоныд рыт" (сьӧм чукӧртӧны, медым гижӧдны социльнӧй учрежденньӧяс коми газет-журнал вылӧ). Со и ковмис вештыштны, медым кад вӧлі тэрмасьтӧг тӧдмасьны уджъяснас да дасьтысьны.


Нимкодь сыысь, мый конкурсыс коми блогосфера ловзьӧдіс, выль блогйысьясӧс чужтіс, а налӧн гижӧдъясыс коми газетъясӧ веськалӧны.

Чайта, журитысьяс да блогйысьяс оз лоны паныд, и локтан во бара на венласьыштам конкурсын.

Комментариев нет:

Отправить комментарий