среда, 14 сентября 2016 г.

Бикинь

Тӧрытсянь гортын выль лов олӧ - каньпи. Талунӧдз сійӧ вӧлі нимтӧм, ӧні бӧрйим нин. Такӧд йитӧдын воддза каньяснымӧс казьтышта.



ГЫЖА
Во дас сайын сиамскӧй каньӧс босьті. Нимыс ӧдйӧ сюри - Гыжа, парсасьӧ да. Сиам каньяслысь ӧбичасӧ тӧдышті нин, эг зіль дзерӧдны. Ӧтчыдысь сійӧ зэв ёна менӧ повзьӧдіс: ӧдзӧсӧс восьті и казялі, мый вылісянь ме вылӧ кӧсйӧ чеччыштны. Эг нин сэсся тэрмасьӧмӧн гортӧ пырлы та бӧрын. Жаль, каньсӧ вошті. Мен колӧ вӧлі гожӧмнас мунны экспедицияӧ, каньсӧ тӧдсалы коли. А сы дорысь асруа каньыд пышйӧма. А гашкӧ и, пон пиньӧ веськалӧма.

ШАНЬ
Мӧд каньӧс 4 во сайын босьті. Ӧтуввез пыр корсим, Эжваысь вайи. Кӧсйим шуны Мичаӧн, но кык арӧса пилы сьӧкыд на вӧлі татшӧм шуанногыс. Тадзи миян лои Шань, Шанькань.

Вайим ичӧтӧн да, вердім йӧлӧн шприц пыр. Ковмис велӧдны асмогасянінӧ ветлыны. Асруа жӧ вӧлі, сюсь синма. Шмонитісны на - туялысь рӧдысь жӧ пӧ.

Колян во казялім каньнымлысь припадокъяс, унатор эз сёй, аппетитыс торксьӧма. Бурдӧдны видлім, но эз отсав. Чайта, висьӧмыс кутіс сӧвмыны сы бӧрын, кыдзи нёльӧд судтасянь уси. Ковмис бырӧдны, медым эз мучайтчы.


БИКИНЬ

Арланьыс выль каньпиӧс корсьны кутім, бара жӧ ӧтуввез пыр. "Кошкин дом" котырысь сюри юӧр, мый аддзӧмаӧсь нёль эновтӧм каньпиӧс, сеталам пӧ. Ас мог йылысь гижи, кори кольӧдны да мен звӧнитны, но эз вочавидзны. Гашкӧ, чайтісны телепон пыр пӧрйӧдчысьӧн да.

Сэсся гӧтыр лыддьӧма тӧдсаыслысь кань сюрӧм йылысь юӧр, пыр и шыӧдчӧма. Тӧдса нылыс каньсӧ удитӧма бурдӧдыштны - пытш ни ков пӧ абу. Мен шуис, мый квайтӧн пӧ гижлісны, каньсӧ корисны, но сета пӧ челядяинӧ.

Нуа тӧрыт ывлаті каньписӧ корӧбын да кыла, мый чужӧмӧй дзирдалӧ шудысла. Кыйи ачымӧс, мися, важӧн нин тадзи эг югъяв.

Пыр жӧ ним кутім бӧрйыны, Контактын шыӧдчим. Вӧзйисны татшӧм нимъяс: Зарни, Шаньга, Ручик, Шудик, Бикинь, Тупыль, ГынКОТ, Шонді, Зарань, Мусик, Рудик, Пудик, Малань кань, Лёва.

Бур нимъяс, но луннас кывкӧрталім - шуам Бикиньӧн, рӧм вӧснаыс ёнджыка. 

Комментариев нет:

Отправить комментарий