Кузь туй

Ёгор пилы садикас сетісны гортса удж - лӧсьӧдны дидактикаа ворсӧм. Отсӧг вылӧ педагогикаысь журналъяс вӧзйылісны, но сэтысь нем эг аддзы лӧсяланаторсӧ. Эг весиг кӧсйы нинӧм вӧчны, но кор аддзи, мый пиӧй мыйкӧ зільӧ, куті жӧ отсасьны.

Дум вылӧ уси гожӧмнас ыджыд мам дорас ворсӧм: кубик шыбитан да лыдпас серти колӧ воськовтны мӧд станцияӧдз. Ворсӧмыс вӧлі роч мойдъяскӧд йитчӧма, гӧгӧр мойдысь персонажъяс да сюжетъяс серпасалӧма. Мойвиас кӧ, аслад фишканад лыбан вывланьӧ (лэбач отсалӧ) либӧ усян увланьӧ (пӧсь ва пӧртйӧ, и с.в.).

Тайӧс тӧд вылын кутӧмӧн ворсӧмсӧ роч кывъя челядьлы дасьтім, кодъяс муртса на кужӧны артасьны да дженьыд кывъяс лыддьыны. Станцияяс вылын коми кыв гижӧма, а орччӧн - серпас. Колӧ кывсӧ лыддьыны, либӧ быд шыпас торйӧн шуны, да серпас вылӧ видзӧдӧмӧн тӧдмавны кывйыслысь вежӧртассӧ.

Уна рӧма серпасъяссӧ "Йӧлӧга" да "Прогород" газетъясысь вундалім. ("Би кинь" жалитыштім)  Зілим аддзыны сэтшӧм серпас, медым петкӧдланторсӧ позис шуны дженьыда (1 либӧ 2 слог), медым кывйын эз вӧвны "сьӧкыд" шыяс: "дж", "дз" да "тш" аффрикатаяс, "ӧ" да "і" шыпасъяс.

Кор вундалӧм серпасъяссӧ кутім гумаг вылӧ пуктавны, тыдовтчис, мый быдса сюжет артмӧ: зон да ныв мунӧны да быдсяма пемӧс да быдмӧг паныдалӧны, а сьӧкыдлун венӧм бӧрын гортас веськалӧны.

Туй кузя мунӧны да, та вӧсна ворсӧмыслы сетім "Кузь туй" ним. Тӧд вылын кутім став мирын тӧдса социолог Питирим Сорокинлысь олан туй йывсьыс роман.

Ёгоркӧд ворсім, сійӧ медводдзаӧн воӧдчис "Керкаӧдз", да и вермис менӧ.

Видлӧй и Ті - и вӧчны татшӧм ворсӧмсӧ, и ворсыштны. Чайта, бура сӧвмӧдас ар 4-6-а челядьлысь и артасян, и лыддьысян сямсӧ.

Эг дышӧдчӧй да шойччан лунъясӧ нӧшта на серпасасим наука тема вылӧ: быттьӧкӧ динозавр юр лыа улысь чурвидзӧ, а кӧнкӧ ылын вулкан тшынасьӧ.