Изьва керкаын

Тайӧ вежонас мӧдысь нуӧдім "Изьва фольклор" небӧг презентация. Медводдзаысь выль пӧжассӧ нимӧдім Сыктывкарса коми культура шӧринын косму тӧлысь 20-ӧд лунӧ. Сэки кӧ чукӧртлім унджык мортӧс, сёрнитім рочӧн, та пӧрйӧ юр сюянін аддзим "Изьва керкаысь": волісны изьватас, варовитім комиӧн. 

Медводз кончертасим. Кыпыд руа сьыланъясӧн рытсӧ восьтісны Василий Рочев да Степан Семяшкин, "Изьва" котыр.

 Сэсся висьтышті небӧг дасьтан удж йылысь. Кык во сайын ветлі Наръян-Марӧ велӧдан семинар вылӧ, петкӧдлі коми ворсӧмъяс. Сэки нин чужис мӧвп дасьтыны Яран кытшын изьва фольклорысь удж, мыйӧн вермасны вӧдитчыны культураын уджалысьяс. Сёрнитчим, кӧсйыси лӧсьӧдны. Медводз архивъясысь чукӧрті мойдъяс да мукӧдтор. Сэсся 2014 воын петавлім экспедицияӧ. Ветлім Яран асвеськӧдлан кытшса Вӧлӧкӧвӧй грездӧ, кӧні век на олӧны изьваса комияс. Ас синмӧн казялім кутшӧма яран да изьва культураыс гӧрддзасьӧма-гартчӧма, но котӧрӧнсорӧн он торйӧд кӧні коми сер, яран мойд ли роч паськӧм.

Та йылысь ме и юӧрті. Фольклор туялысь Вера Кудряшова казьтыштіс 1970-ӧд воясся экспедицияяс йылысь. А филология доктор Евгений Игушев - небӧглӧн рецензент - корсьӧма уджъяссьыс кывъяс, кодъяс оз паныдасьлыны сёрнисикас кывкудъясын (хануку, ярась юра, и с.в.). Гарыштіс, мый небӧг лӧсьӧдысьясӧс пӧ позьӧ вӧзйыны Коми республикаса Правительстволӧн премиа вылӧ. Олӧмыс петкӧдлас!

Лӧня кывзысьяслы юалӧм дасьті. Мися, кыдзи шуӧны дадювса кӧръяссӧ? Медстӧча вочавидзис Татьяна Егоровна (нывдырся овыс - Выучейская) - Наръян-Марланьыс ачыс, кыдзи тӧдмалі сэсся. 

"Изьва керкаӧ" волісны гӧсьтъяс - Обдорысь тележурналистъяс да студентъяс, кодъяс велӧдчӧны Сыктывкарын. Анатолий Терентьев воӧма татчӧ аслас уджъясыслы выль материал гижны. Козьналім сылы небӧгнымӧс. 

Тшаюйтігӧн изьва культура, фольклор да кыв йылысь мӧвпъясӧн юксим. Бур пӧ эськӧ изьва районын олӧма йӧзсӧ юасьны, гижны да небӧг лэдзны...