четверг, 30 апреля 2015 г.

Вӧлӧкӧвӧйын вежон

Коми фольклор чукöртöм могысь уналаö удитi волыны бöръя дас вит вонас. Вöлi миян республикалöн районъясын, Перым-Коми кытшын, Из сайын — Казымса изьватас ордын. Колян во мойвиис воöдчыны Вöлöкöвöйöдз — Яран асвеськöдлан кытшын войвывса ичöтик грездöдз.

Сэтчöдз ветлыны отсалiс Яран асвеськöдлан кытшса этнокультура шöрин. Сэнi уджалысь, коми юкöнöн веськöдлысь О.М. Коцюбанская ас кадö вöзйис ветлыны ылыс грездъясö, кöнi олöны изьваса комияс. Культура юкöнын зiльысьяслы колöны вöлi ас кытшын чукöртöм фольклор гижöдъяс, медым на вылö позис мыджсьыны гажъяс дасьтiгöн. Со и корисны менö отсöг вылö. Медым войвывса комияслысь олöм-вылöмсö паськыдджыка петкöдлыны Комиын, дум вöлi телеканалысь кодöскö чукöстны, но сьöмыс этша налöн да, эз кöсйысьны ветлынысö.

воскресенье, 26 апреля 2015 г.

Субӧтникасим

Пилы важӧн нин ичӧтик кӧрт зыр корсим. Сӧмын таво сюрис - гежӧд вузаланторйӧн вӧлӧма. Пыр жӧ и петалім субӧтникасьны. 


Библиовояси

Кыдзи и кык во сайын, бара ветлі библиовоясьны - пырӧдчи "Библиовой - 2015" ставроссияса акцияӧ, мый чуксалӧ йӧзӧс небӧг лыддьыны. Таво корисны менӧ Национальнӧй библиотекаӧ, вӧзйисны краеведение юкӧнын нуӧдны шегъясьӧм серти мастер-класс. 



Изьва керкаын

Тайӧ вежонас мӧдысь нуӧдім "Изьва фольклор" небӧг презентация. Медводдзаысь выль пӧжассӧ нимӧдім Сыктывкарса коми культура шӧринын косму тӧлысь 20-ӧд лунӧ. Сэки кӧ чукӧртлім унджык мортӧс, сёрнитім рочӧн, та пӧрйӧ юр сюянін аддзим "Изьва керкаысь": волісны изьватас, варовитім комиӧн. 

вторник, 21 апреля 2015 г.

Сӧлӧ баблы сиӧма

Быд во Сыктывкарбердса посёлокъясысь ӧтиын мунӧ коми коллективъясӧс ӧтувтан фестиваль. "Кужам сьывны, кужам и ворсны" ним улын сійӧ тӧдса некымын во нин. Котыртӧ Юркарса коми культура шӧрин да "Коми войтыр" ӧтмунӧмлӧн Сыктывкарса юкӧн.

Таво фестивальыс вӧлі Гӧрд Затонса "Волна" культура керкаын. Ветлі Ёгор пикӧд. Зэра поводдя вӧснаыс, гашкӧ, видзӧдысьыс вӧлі эз сэтшӧм уна. 




Небӧг нимӧдім

Войдӧрлун нимӧдім "Изьва фольклор" небӧг. Та йылысь гижи рочӧн. Гижи дженьыда, медшӧрсӧ. Презентация йылысь позьӧ лыддьыны менам мӧд блогысь; сэн жӧ унджык фото.



среда, 15 апреля 2015 г.

Выль небӧг

Важӧнкодь петіс, но неважӧн на Сыктывкарӧ воис выль небӧг. Фольклор ӧктӧд дасьті В.М. Кудряшовакӧд колян во, сійӧ вӧлі печатайтӧма колян во, а киӧ босьті медводдзаысь некымын лун сайын. Дыр виччысяна пӧжас! Небӧглӧн нимыс - "Фольклор ижемских коми в Ненецком автономном округе". Кызтаыс - 504 лист бок. Йӧзӧдӧма Яран асвеськӧдлан кытшысь Этнокультурнӧй шӧрин корӧм серти да налӧн сьӧм весьтӧ.